ಹರಿದಾಸರ ಕೀರ್ತನೆ

ಎಂಥ ಟವಳಿಗಾರನಮ್ಮ ನಂದ ಗೋಪಮ್ಮ ಕೇಳೆ – ನಿನ್ನ ಮಗ ಎಂಥ ಟವಳಿಗಾರನಮ್ಮ ಹಣವ ಕೊಟ್ಟೇನೆಂದು ಗುಣದಿಂದ ಎನ್ನ ತಂದ ಹಣವ ಕೇಳಿದರಲ್ಲಿ - ಹಣವೆ ? ತಡೆಯಲಾರದ ತಲ್ಲಣವೆ ? ಕುದುರೆ ಮೇಲಿನ ಪಲ್ಲಣವೆ ? ಇಲ್ಲ, ಬಾಯಿಗಿಟ್ಟ ಬೊಕ್ಕಣವೆ ? –ಹೋಗೆನುತಾನೆ ಕೊಪ್ಪಾನೆ ಕೊಟ್ಟೇನೆಂದು ಒಪ್ಪಿಸಿ ಎನ್ನ ತಂದ ಕೊಪ್ಪಾನ ಕೇಳಿದರಲ್ಲಿ - ಕೊಪ್ಪ ? ಊರಮುಂದಿನ ತಿಪ್ಪ ? ಕೇರಿಯೊಳಗಿನ ಕೆಪ್ಪ ? ಕೆರೆಯೊಳಗಿನ ಹುಳಿಸೊಪ್ಪ ? -ಹೋಗೆನುತಾನೆ ಬಳೆಯ ಕೊಟ್ಟೇನೆಂದು ಬಲು ಮಾತಿನಲಿ ತಂದ ಬಳೆಯ ಕೇಳಿದರಲ್ಲಿ - ಬಳೆಯೆ ? ಊರ ಮುಂದಿನ ಗಳೆಯೆ ? ಗದ್ದೆಯೊಳಗಿನ ಕಳೆಯೆ ? ಕೈಕಾಲ ಹಿಡಿದು ಸೆಳೆಯೆ ? - ಹೋಗೆನುತಾನೆ ವಾಲೆಯ ಕೊಟ್ಟೆನೆಂದು ಒಲವಿನಿಂದ ತಂದ ವಾಲೆಯ ಕೇಳಿದರಲ್ಲಿ – ವಾಲೆ ? ಕನ್ನಡಿಯ ಕಪೋಲೆ ? ಹೇಳು ಸುದ್ದಿ ಸುವ್ವಾಲೆ ? ನಿನ್ನ ಕಾಲಿಗೆ ಸಂಕೋಲೆ ? - ಹೋಗೆನುತಾನೆ ಕಡಗವ ಕೊಟ್ಟೇನೆಂದು ಸಡಗರದಿಂದ ತಂದ ಕಡಗ ಕೇಳಿದರಲ್ಲಿ - ಕಡಗ ? ಅಂಬರದ ಗುಡುಗ ? ಮುಂಗೈ ಮೇಲಿನ ಗಿಡುಗ ? ಎತ್ತಿನ ಮ್ಯಾಲಿನ ಧಡಗ ? – ಹೋಗೆನುತಾನೆ ಬುಗುಡಿಯ ಕೊಟ್ಟೇನೆಂದು ರಗಡು ಕಿವಿಹಿಂಡಿ ತಂದ ಬುಗುಡಿ ಕೇಳಿದರಲ್ಲಿ - ಬುಗುಡಿ ? ಪಾಂಡವರಾಡಿದ ಪಗಡಿ ? ಮೂಗಿಂದ ಸುರಿವ ನೆಗಡಿ ? ಛಿ ! ನೀನೆಂಥ ಧಗಡಿ ? – ಹೋಗೆನುತಾನೆ ಆದಿಕೇಶವನ ಮೇಲೆ ಆಣೆಯಿಟ್ಟು ಕರೆತಂದ ಆಣಿ ಎಲ್ಲಹುದೆಂದು ತೋರ್ದ ಆನಂದದಿಂದಲಿ ಬೆರೆದ ಬೀದಿಗೆ ಬಂದು ಕರೆದ ಹೀಂಗೆ ಧರೆಯೊಳು ಮೆರೆದ - ಶ್ರೀ ಕೃಷ್ಣರಾಯ

Comment None