ಹರಿದಾಸರ ಕೀರ್ತನೆ

ಶೇಷಶಯನನೊಲಿದೀವ ಭಾಗವತ ಜನರಿಗೆ ಭಯ ಭಕ್ತಿ ಮಂತ್ರಗಿಂತ್ರಗಳ ವಾದ ಬಯಲು ದೈವಂಗಳವುಷದಿಗಿವುಷದಿ ಜಯಾಪಜಯವೆಂಬ ಜನ್ಮಪ್ರಕೃತಿ - ತಾಪ ತ್ರಯಗಳೆಂಬ ತಾಮಸಗೀಮಸ ವಯಸಿಗೆ ಬಾರದ ಸುಜ್ಞಾನಗಿಜ್ಞಾನ - ನಿ ರ್ಣಯಗಳಾಗದೆ ಮಂತ್ರದರ್ಥಗಿರ್ಥ ನಯದಿಂದ ನರಹರಿಯ ಹೊಗಳುವರಿಗೆ ಶೇಷ ಶಯನನೊಲಿದೀವ ಭಾಗವತ ಜನರಿಗೆ ಕಾಲ ಮೃತ್ಯು ಕಂಟಕಗಳ ಕಷ್ಟಗಿಷ್ಟ ಸುಖಾನು- ಕೂಲಗಿನುಕೂಲ ದಾರಿದ್ರ, ದುಕ್ಕಗಿಕ್ಕ ಮೇಲೆ ಬಹ ನಿಂದೆ ನಿಷ್ಟೂರಗಿಷ್ಟೂರ - ಭೂ ಪಾಲರಟ್ಟುಳಿ ವಾಕು ವಾದಗೀದ ಶೀಲ ಸೂತಕ ನೇಮಗೀಮ – ದೇವತಾ ಪ್ರಸ್ತ ಕಾಲದಲಿ ಮಾಳ್ವ ಉಪವಾಸಗಿಪವಾಸ ನಾಲಗೆಯ ಮೇಲೆ ಅನವರತ ಹೊಗಳುವ ಗೋ- ಪಾಲಕೃಷ್ಣ ಭಾಗವತ ಜನರಿಗೆ ಹಿಡಿತಬಿಡಿತಗಳೆಂಬ ಹಿಂಚುಮುಂಚುಗಳು ಪರ ರೊಡವೆಯ ಮೇಲಣಾಸೆಗೀಸೆ ನಡವಳಿಕೆ ದೋಷ ಪ್ರಾಯಗೀಯ ದ್ವಿಜಗಿತ್ತ ದು- ರ್ನುಡಿಗಳಾಡಿದರೆಂಬ ನೋವುಗೀವು ಮಡದಿ ಮಕ್ಕಳು ಭೂಮಿಕ್ಷೇತ್ರ ದೋಹ ಮಾನ ಒಂ- ದೆಡರು ಬಂದೀತೆಂಬ ಚಿಂತೆಗಿಂತೆ ಪೊಡವಿ ಪತಿ ನರರುಲಿಯೆ ಜಿಹ್ವಾಗ್ರ ಮಧ್ಯದಲಿ ಪಡೆದು ಪಾಡುವ ಭಾಗವತ ಜನರಿಗೆ ತೀರ್ಥಯಾತ್ರೆಯ ಗಮನಗಿಮನ - ಮನ್ನಣೆಯವರ ಕೂರ್ತು ಫಲವೀವ ಕೋರಿಕೆಗೀರಿಕೆ ಪ್ರಾರ್ಥನೆಯ ಹರಕೆ ಹರಿದಿನಗಿರಿದಿನಗಳೆಂಬ ಬಹು ವಾರ್ತೆಯುನ್ನತಿಸುವ ದಿವಸಗಿವಸ ಧೂರ್ತ ಪ್ರಭಾವ ನಿಗಳಂ ಮತ್ತೆ ಮೋ- ಕ್ಷಾರ್ಥ ಬೇಕೆಂಬ ಸಂದೇಹಗಿಂದೇಹ ಧೂರ್ತ ಭಂಜನ ಲಕ್ಷ್ಮೀ ಮನೋಹರನ ಸಂ- ಕೀರ್ತಿಸುತಿಹ ಭಾಗವತ ಜನರಿಗೆ ಎಲ್ಲಿಹುದು ಸರ್ವಸಂಗ ಪರಿತ್ಯಾಗವು ಮ- ತೆಲ್ಲಿಹುದು ಸುಜ್ಞಾನಯೋಗಿಗಳಿಗೆ ಎಲ್ಲಿಹುದು ಯಾತ್ರಾಚಾರಂಗಳಿತರರಿಗೆ ಎಲ್ಲಿಹುದು ನಿತ್ಯ ನಿರ್ಮಳ ಹರಿಗೆ ಎಲ್ಲಿಹುದು ಹರಿಯ ದಾಸಾನುದಾಸರಿಗೆ ಮ- ತೆಲ್ಲಿಹುದು ಪರಬ್ರಹ್ಮ ಪುತ್ಥಳಿಗೆ ಬಲ್ಲಿದನು ಕಾಗಿನೆಲೆಯಾದಿ ಕೇಶವನಲ್ಲ ದಿಲ್ಲೆನುತಿಹ ಭಾಗವತ ಜನರಿಗೆ

Comment None