ಹರಿದಾಸರ ಕೀರ್ತನೆ

ಹಂಚಿನ ಇದಿರಲಿ ಹಲ್ಲನು ತೆಗೆಯಲು ಮಿಂಚುವ ಕನ್ನಡಿಯಾದೀತೆ ? ಮಿಂಚಿನ ಬೆಳಕಲಿ ದಾರಿಯ ನಡೆದರೆ ಮುಂಚುವ ಊರಿಗೆ ಮುಟ್ಟಿತೆ ? ಬಾಲರ ಭಾಷೆಯ ನಂಬಿ ನಡೆದರೆ ಶೀಲದ ಕೆಲಸಗಳಾದೀತೆ ? ಜೋಲುವ ಹೋತಿನ ಮೊಲೆಗಳ ಹಿಂಡಲು ಹಾಲಿನ ಹನಿಯದು ಹೊರಟೀತೆ ? ಕಾಲುವೆ ಬಚ್ಚಲಕುಣಿ ನೀರಿಗೆ - ಘನ ಬಾಳೆಯ ತೋಟವು ಆದೀತೆ ? ಮೇಲುಬಣ್ಣದಾ ಆಲದ ಹಣ್ಣು ನಾಲಿಗೆಸವಿಯನು ಕೊಟ್ಟೀತೆ ? ಭಾಷೆಯ ನುಡಿಗಳಿಗಾಸೆ ಮಾಡೆ ಮನ ದಾಸೆಯ ಕಾರ್ಯಗಳಾದೀತೆ ? ದೋಸೆಯ ಛಿದ್ರದಿ ಆರಿಸೆ ಕಾಳಿನ ರಾಶಿಯು ಹಸನವು ಆದೀತೆ ? ಕಾಸಿ ಕಬ್ಬಿಣವ ಗಟ್ಟಿ ಕೂಡಿಟ್ಟರೆ ಮಾಸದ ಮನೆ ಬದುಕಾದೀತೆ ? ಕಾಸಾರದೆದುರಿಗೆ ಹರಿಕಥೆ ಹೇಳ್ದರೆ ಸೂಸಿ ಕೇಳ್ದು ತಲೆದೂಗೀತೆ ? ಮಿಥ್ಯಾವಚನಿಯ ಮಾತನು ನಂಬಲು ಹೊತ್ತಿಗೆ ಅದು ಬಂದೊದಗೀತೆ ? ಸತ್ತವನೆದುರಿಗೆ ಸುತ್ತಲು ಕುಳಿತು ಅತ್ತರೆ ಆ ಹೆಣ ಕೇಳೀತೆ ? ನಿತ್ಯನಪುಂಸಕನೈದಲು ತರುಣಿಗೆ ಚಿತ್ತ ಸುಖವು ಸೂರ್ಯದೀತೆ ? ಕುತ್ತಿಗೆಗೊಯ್ಕನ ಕಾಲು ಹಿಡಿದರೆ ಹತ್ಯದೊಳ್ ಹೇಸಿಕೆ ಹುಟ್ಟೀತೆ ? ಬೋರಗಲ್ಲಿನ ಮುಂದೆ ಬಡತನ ಹೇಳಲು ಸಾರಸುಖಕ್ಕನುವಾದೀತೆ ? ಚೋರನು ಚಂದ್ರಗೆ ಕೈಮರೆ ಮಾಡಲು ಚೌರ್ಯಕೆ ಕತ್ತಲು ಒದಗೀತೆ ? ನೀರಿಲ್ಲದ ಕೆರೆಯೊಳಗೆ ಮತ್ಸ್ಯದಾ ಹಾರಿಗೆ ಮೀನವು ದೊರಕೀತೆ ಕಾರಣವಿಲ್ಲದ ಲೌಕಿಕ ಕಥೆಯಿಂ ಘೋರ ನರಕ ಭಯ ತಪ್ಪೀತೆ ? ಬೆಟ್ಟಕೆ ಕಲ್ಲನು ಹೊತ್ತೊಯ್ದೊಗೆಯಲು ಹೊಟ್ಟೆಗೆ ಓದನ ಸಿಕ್ಕೀತೆ ? ಹುಟ್ಟು ಬಂಜೆಗೆ ಹಡೆಯುವ ವ್ಯಥೆ ಹೇಳಲು ಹೊಟ್ಟೆಯಲಿ ಕಳವಳ ಹುಟ್ಟೀತೆ ? ಕೆಟ್ಟ ಬಯಸುವರಿಗೆ ಮೃಷ್ಟಾನ್ನವುಣಿಸಲು ಕೆಟ್ಟ ಮಾತು ಅದು ಬಿಟ್ಟೀತೆ ? ದಿಟ್ಟ ಪುರಂದರವಿಠಲರಾಯನ ಬಿಟ್ಟರೆ ಸದ್ಗತಿಯಾದೀತೆ?

Sthala Comment None