ಎಚ್ಚರಿಕೆ ಎಚ್ಚರಿಕೆ ಮನವೆ - ನಮ್ಮ
ಅಚ್ಯುತನ ಪಾದಾರವಿಂದ ಧ್ಯಾನದಲಿ
ಆಶಾಪಾಶದೊಳಗೆ ಸಿಲುಕಿ -ಬಹು
ಕ್ಲೇಶಪಟ್ಟು ತುಚ್ಛ ಸುಖದಿ ಮರುಳಿಕ್ಕಿ
ಹೇಸಿ ಸಂಸಾರದಲಿ ಸಿಲ್ಕಿ - ಮಾಯಾ
ಕ್ಲೇಶ ಅಂಬರ ಕೆಳಗೆ ಮೈಮರೆತು ಸೊಕ್ಕಿ
ಹಣ - ಹೆಣ್ಣು - ಮಣ್ಣಾಸೆ ವ್ಯರ್ಥ - ಈ
ತನುವಿಗೆ ಯಮಪುರ ಪಯಣವೇ ನಿತ್ಯ
ಮೂರು ಶೃಂಗಾರಗಳು ಮಿಥ್ಯ ಅಂತ
ಕನ ಯಾತನೆಗಳಿಗೆ ಹರಿನಾಮ ಪಥ್ಯ
ತೊಗಲ ಚೀಲ ಒಂಬತ್ತು ಹರುಕು - ನರ
ಬಿಗಿದು ಕಟ್ಟಿ ಒಳಗೆ ಎಲುವುಗಳ ಸಿಲುಕು
ಬಗೆರಕ್ತ - ಮಾಂಸದ ಹುಳುಕು – ಒ
ಳಗೆ ಮಲ ಕಫ - ವಾತ ಪಿತ್ತದ ಸರಕು
ದುಷ್ಟರ ಸಹವಾಸ ಹೀನ ಬಲು
ಇಷ್ಟ ಜನಸಂಗವು ಹರಕೆ ಬಹುಮಾನ
ಎಷ್ಟು ಓದಿದರಷ್ಟು ಜ್ಞಾನ -ಆದರ
ಲ್ಲಿಟ್ಟು ಭಕುತಿಯ ತಿಳಿಯೆಲೊ ಸಾವಧಾನ
ನಾಲಿಗೆಯ ಹರಿಯ ಬಿಡಬೇಡ - ತಿಂಡಿ
ವಾಳರ ರುಚಿಪಾಕಗಳನೂರಿಸಬೇಡ
ಹಾಳು ಮಾತು ಆಡಬೇಡ -ಶ್ರೀ
ಲೋಲ ಪುರಂದರವಿಠಲನ ಬಿಡಬೇಡ
