ಗಿಳಿಯು ಪಂಜರದೊಳಿಲ್ಲ - ಶ್ರೀ ರಾಮ ರಾಮ |
ಗಿಳಿಯು ಪಂಜರದೊಳಿಲ್ಲ
ಅಕ್ಕ ಕೇಳೆ ಎನ್ನ ಮಾತು |
ಚಿಕ್ಕದೊಂದು ಗಿಳಿಯ ಸಾಕಿದೆ |
ಅಕ್ಕ ನಾನಿಲ್ಲದ ವೇಳೆ ।
ಬೆಕ್ಕು ಕೊಂಡು ಹೋಯಿತಯ್ಯೋ
ಅರ್ತಿಗೊಂದು ಗಿಳಿಯ ಸಾಕಿದೆ 1
ಮುತ್ತಿನ ಹಾರವನು ಹಾಕಿದೆ |
ಮುತ್ತಿನಂಥ ಗಿಳಿಯು ತಾನು ।
ಎತ್ತ ಹಾರಿ ಹೋಯಿತಯ್ಯೋ
ಹಸಿರು ಬಣ್ಣದ ಗಿಳಿಯು |
ಕುಶಲ ಬುದ್ಧಿಯ ಗಿಳಿಯು I
ಹಸಗುಂದಿ ಗಿಳಿಯು ತಾ ॥
ಮೋಸ ಮಾಡಿ ಹೋಯಿತಯ್ಯೋ
ಮುಪ್ಪಾಗದ ಬೆಣ್ಣೆಯ
ತಪ್ಪದೆ ಹಾಕಿದೆ ಹಾಲು ||
ಒಪ್ಪದಿಂದ ಕುಡಿದು ತಾನು |
ಗಪ್ಪನೆ ಹಾರಿ ಹೋಯಿತಯ್ಯೋ
ಒಂಬತ್ತು ಬಾಗಿಲ ಮನೆಯು |
ತುಂಬಿದ ಸಂದಣಿ ಇರಲು ||
ಕಂಬ ಮುರಿದು ಡಿಂಬ ಬಿದ್ದು 1
ಅಂಬರಕಡರಿ ಹೋಯಿತಯ್ಯೋ
ರಾಮ ರಾಮ ಎಂಬ ಗಿಳಿಯು |
ಕೋಮಲ ಕಾಯದ ಗಿಳಿಯು ॥
ಸಾಮಜಪೋಷಕ ತಾನು |
ಪ್ರೇಮದಿ ಸಾಕಿದ ಗಿಳಿಯು
ಅಂಗೈಯಲಾಡುವ ಗಿಳಿಯು |
ಮುಂಗೈಯ ಮೇಲಿನ ಗಿಳಿಯು
ರಂಗ ಪುರಂದರವಿಠಲನಂತ |
ರಂಗದೊಳಿಹ ಗಿಳಿಯು
