ಹರಿದಾಸರ ಕೀರ್ತನೆ

ಶೃಂಗಾರವಾಗಿದೆ ಸಿರಿರಂಗನ ಮಂಚ ಅಂಗನೆ ಮಹಲಕುಮಿಯರಸ ಮಲಗುವ ಮಂಚ ಬಡಿಗ ಮುಟ್ಟದ ಮಂಚ | ಮಡುವಿನೊಳಿಹ ಮಂಚ । ಮೃಡನ ತೋಳಲಿ ನೆಲಸಿಹ ಮಂಚ | ಹೆಡೆಯುಳ್ಳ ಹೊಸಮಂಚ ಪೊಡವಿ ಹೊತ್ತಿಹ ಮಂಚ । ಕಡಲಶಯನ ಶ್ರೀ ರಂಗನ ಮಂಚ ಕಣ್ಣುಮೂಗಿನ ಮಂಚ ಬೆನ್ನು ಬಾಗಿದ ಮಂಚ | ಹುಣ್ಣಿಮೆಯ ಚಂದ್ರಮನ ಅಡ್ಡಗಟ್ಟುವಮಂಚ ॥ ಬಣ್ಣ ಬಿಳುಪಿನ ಮಂಚ ಹೊನ್ನು ಕಾದಿಹ ಮಂಚ । ಚೆನ್ನಿಗ ಪರೀಕ್ಷಿತನ ಪ್ರಾಣವ ಕೊಂಡ ಮಂಚ ಕಾಲಿಲ್ಲದೋಡುವ ಮಂಚ | ಗಾಳಿ ನುಂಗುವ ಮಂಚ | ನಾಲಿಗೆಯೆರಡುಳ್ಳ ವಿಷದ ಮಂಚ ॥ ಏಳು ಹೆಡೆಯ ಮಂಚ | ಮೂಲೋಕದೊಡೆಯನ ಮಂಚ | ಕಾಳಗದಲಿ ಕಿರೀಟಿಯ ಮುಕುಟಕೊಂಡ ಮಂಚ ಹಕ್ಕಿಗೆ ಹಗೆಯಾದ ಮಂಚ | ರೊಕ್ಕ ಮುಟ್ಟದ ಮಂಚ | ರಕ್ಕಸರೆದೆದಲ್ಲಣನ ಮಂಚ ॥ ಸೊಕ್ಕು ಪಿಡಿದ ಮಂಚ । ಫಕ್ಕನೆ ಪೋಗುವ ಮಂಚ | ಲಕ್ಕುಮಿ ರಮಣ ಶ್ರೀ ಹರಿಯ ಮಂಚ ಅಂಕುಡೊಂಕಿನ ಮಂಚ । ಅಕಲಂಕ ಮಹಿಮ ಮಂಚ । ಸಂಕರುಷಣನೆಂಬ ಸುಖದ ಮಂಚ । ಶಂಕರನ ಕೊರಳಿಗೆ ಪದಕವಾಗಿಹ ಮಂಚ । ವೆಂಕಟ ಪುರಂದರ ವಿಠಲ ರಾಯನ ಮಂಚ

Sthala Comment None