ನಾ ಮುಂದೆ ಕೃಷ್ಣ ನೀ ಎನ್ನ ಹಿಂದೆ-ನಿನ್ನ-।
ನಾಮವೆ ಕಾಯಿತು ನಾನೇನೆಂದೆ
ಸುರತರು ನೀನು ಫಲ ಬಯಸುವೆ ನಾನು |
ಸುರಧೇನು ನೀನು ಕರೆದುಂಬೆ ನಾನು ||
ವರಚಿಂತಾಮಣಿ ನೀನು ಪರಿಚಿಂತಿಸುವೆ ನಾನು ।
ಶರಧಿಕ್ಷೀರನು ನೀನು ತರಳನೈ ನಾನು
ಅನಾಥನೈ ನಾನು ಎನಗೆ ಬಂಧುವು ನೀನು |
ದೀನ ಮಾನವ ನಾನು ದಯವಂತ ನೀನು ||
ದಾನವಂತಕ ನೀನು ಧೇನಿಸುವೆನು ನಾನು |
ಜ್ಞಾನಗಂಭೀರ ನೀನು ಅಜ್ಞಾನಿ ನಾನು
ಒಂದರೊಳೊಂದೊಂದು ನಿನಗೆ ನಾ ಸಲಿಸುವೆ |
ಚೆಂದವಾಯಿತು ನಿನ್ನ ಸ್ತುತಿಯಿಂದಲಿ ||
ತಂದೆ ಪುರಂದರವಿಠಲರಾಯ ನೀ ।
ಬಂದೆನ್ನ ಮನದಲ್ಲಿ ನಲಿನಲಿದಾಡೊ
