ರಂಗನ ನೋಡಿರೆ ರಾಯ ಚೆನ್ನಿಗ ನರ-
ಸಿಂಗನ ದೇವಕಿದೇವಿಯ ಸುತನ
ಥಳಿಥಳಿಸುವ ನಗುಮೊಗದ ಚೆನ್ನಿಗನ ।
ಪೊಳೆವ ವಜ್ಜರದ ಕಿರೀಟವಿಟ್ಟವನ ॥
ಪ್ರಳಯ ಕಾಲದಿ ವಟಪತ್ರಶಯನನ |
ನಳಿನಭವನ ನಾಭಿಯಲ್ಲಿ ಪೆತ್ತವನ
ಆಣಿಮುತ್ತಿನ ದುಂಡು ಮಕರಕುಂಡಲನ |
ಭಾನುಪ್ರಭೆಯ ಭುಜಕೀರ್ತಿಯೊಪ್ಪುವನ ॥
ಕಾಣಿಸೆ ಅಪರಂಜಿ ಕಡಗ ಕಂಕಣ ಹೊಸ |
ಮಾಣಿಕದುಂಗುರವಿಟ್ಟು ಮೆರೆವನ
ಕಮಲಾಮನೋಹರ ಕಮಲಜ ಪಿತನ |
ರಮಣಿಗೆ ಪಾರಿಜಾತವನೇ ತಂದವನ |
ಕ್ರಮದಿಂದ ಭಸ್ಮಾಸುರನ ಕೊಂದವನ |
ರಮೆಯಾಣ್ಮನೆನ್ನಲು ಇಹಪರವೀವನ
ಶುಕ್ರವಾರ ಪುಲಕು ಪೂಜೆಗೊಂಬವನ |
ಸಕ್ಕರೆ-ಹಾಲು-ಬೆಣ್ಣೆಯ ಮೆಲ್ಲುವವನ ॥
ಗಕ್ಕನೆ ಸುರರಿಗೆ ಅಮೃತವಿತ್ತವನ |
ರಕ್ಕಸದಲ್ಲಣ ರಾವಣಾಂತಕನ
ಪಾಪವಿನಾಶದಿ ಸ್ನಾನವ ಮಾಡಿ |
ಪಾಪಗಳೆಲ್ಲ ಬೇಗನೆ ಬಿಟ್ಟು ಓಡಿ ॥
ಈ ಪರಿಯಿಂದಲಿ ಮೂರುತಿ ನೋಡಿ |
ಶ್ರೀಪತಿ ಪುರಂದರವಿಠಲನ ಪಾಡಿ
Music
Courtesy:
ಸ್ಥಲ -
ಕೀರ್ತನೆ
ವಿಷಯ -
ಪುರಾಣ ಮೂಲದ ಹರಿ ಸ್ತುತಿ
