ಹೇಗೆ ಉದ್ಧಾರ ಮಾಡುವನು - ಶ್ರೀ ಹರಿ |
ಹೀಗೆ ದಿನಗಳೆದುಳಿದವನ
ರಾಗದಿಂದಲಿ ಭಾಗವತರಿಗೆ ।
ಬಾಗದಲೆ ತಲೆ ಹೋಗುವಾತನ
ಅರುಣೋದಯಲೆದ್ದು ಹರಿಯೆನ್ನದಲೆ ಗೊಡ್ಡು |
ಹರಟೆಯಲಿ ಹೊತ್ತು ಏರಿಸಿದವನ ।।
ಸಿರಿ ತುಲಸಿಗೆ ನೀರನೆರೆದು ನಿರಂತರ |
ಧರಿಸದೆ ಮೃತ್ತಿಕೆ ತಿರುಗುತಲಿಪ್ಪನ ॥
ಮರೆತು ಸ್ನಾನ ಮನೆಮನೆ ತಿರುಗುತ ಹೊಟ್ಟಿ |
ಕೆರೆದಾಗ ಬೇಯಿಸಿಕೊಂಡು ತಿನ್ನುವನ
ಗುರುಹಿರಿಯರ ಸೇವೆ ಜರೆದು ನಿರಂತರ |
ಪರನಿಂದೆಯ ಮಾಡಿ ನಗುತಿಹನ ||
ಪರಹೆಣ್ಣು ಪರಹೊನ್ನು ಕರಗತವಾಗಲೆಂದು |
ಪರಲೋಕ ಭಯಬಿಟ್ಟು ತಿರುಗುವನ ॥
ತರುಣಿ ಮಕ್ಕಳನು ಇರದೆ ಪೋಷಿಸಲೆಂದು |
ಪರರ ದ್ರವ್ಯ ಕಳವು ವಂಚನೆ ಮಾಳ್ವನ
ನಡೆಯಿಲ್ಲ ನುಡಿಯಿಲ್ಲ ಪಡೆಯಲಿಲ್ಲ ಪುಣ್ಯವ ।
ಬಿಡವು ನಿನ್ನ ಪಾಪಕರ್ಮಗಳೆಂದಿಗು |
ಸಡಲಿದಾಯುಷ್ಯವು ಕಡೆಗೂ ಸ್ಥಿರವೆಂದು ।
ಕಡುಮೆಚ್ಚಿ ವಿಷಯದೊಳಿಪ್ಪನ ||
ಒಡೆಯ ಶ್ರೀಪುರಂದರ ವಿಠಲರಾಯನ |
ಅಡಿಗಳ ಪಿಡಿಯದೆ ಕಡೆಗೂ ಕೆಟ್ಟವನ
Music
Courtesy:
ಸ್ಥಲ -
ಕೀರ್ತನೆ
ವಿಷಯ -
ಶ್ರೀ ಹರಿ ಸಂಕೀರ್ತನೆ
