ಹರಿದಾಸರ ಕೀರ್ತನೆ

ಗಂಗಾದಿತೀರ್ಥ ಫಲಂಗಳ ನೀವುದು- ಹರಿಯ ನಾಮ । ಹಿಂಗದೆ ಜನರಿಗೆ ಮಂಗಳವೀವುದು- ಹರಿಯ ನಾಮ ವೇದಶಾಸ್ತ್ರಂಗಳ ಅರಿಯದ ಜನರಿಗೆ- ಹರಿಯ ನಾಮ ಜಗ| ದಾದಿಪುರುಷನನು ಪೂಜಿಸಿದವರಿಗೆ- ಹರಿಯ ನಾಮ ॥ ಸಾಧಿಸುವೆವು ಪರವೆಂಬಂಥ ಜನರಿಗೆ- ಹರಿಯ ನಾಮ । ಶೋಧಿಸಿ ಇಟ್ಟ ಚಿನ್ನದ ಗಟ್ಟಿ ಕಾಣಿರೊ- ಹರಿಯ ನಾಮ ಸ್ನಾನ ಜಪಂಗಳ ಸಾಧಿಸಿದವರಿಗೆ- ಹರಿಯ ನಾಮ । ದಾನಧರ್ಮಕ್ಕೆ ಒದಗದ ಮನುಜರಿಗೆ- ಹರಿಯ ನಾಮ | ಧ್ಯಾನವೊಂದರಿಯದ ಮೂಢಾತ್ಮ ಜನರಿಗೆ - ಹರಿಯ ನಾಮ । ಮನುಷ್ಯ ಜನ್ಮವ ಪಾವನ ಮಾಡುವುದು - ಹರಿಯ ನಾಮ ವೇಳೆವೇಳೆಗೆ ವೆಚ್ಚ-ವ್ಯಯಗಳ ನೀವುದು- ಹರಿಯ ನಾಮ । ಜಾಳಿಗೆ ಮಾಳಿಗೆ ಮನೆಯ ನೆಚ್ಚದೆ ಪೇಳಿ- ಹರಿಯ ನಾಮ ॥ ಕಾಲನವರು ಬಂದು ಕದಲಲಾಗದ ಮುನ್ನ- ಹರಿಯ ನಾಮ | ಶ್ರೀಲೋಲ ಪುರಂದರವಿಠಲನ ಒಲುಮೆಗೆ- ಹರಿಯ ನಾಮ

Sthala Comment None